Pro Sevadore Vàrgiu
1.
Partidu ses chentza mi saludare,Et pèrdidu-appo de mannu importu
Unu Tiu, amadu, bravu-a poetare,
Chi in-d'un'ottada già si ch'est mortu.
Sa vida-in ispidale, pro tribagliàre,
A betzu a sos tuos dende cunfortu.
Lassadu-as musas, in-d'unu momentu,
Chi galu oe sunt in chirca'e assentu.
2.
Imbitzadu già m'as a sa chiterra,
A bider cun ojos nòos tenore,
A semenare et tzappare terra,
Cuntivizare sa roba, su laòre.
Assaniàdu fisti, chentza cundiérra,
Ammiradu da-e tottu, caru Tore.
Cun Peppe Sozu rimas como cantas:
So seguru, a Deus puru incantas.
3.
Da-e criadura sighende cuss'arveghe
Cun Peppe, frade tou, a chida intréa
Suerende, leénde frittu, chentza neghe,
In dies caldas et puru in notte fea.
Fummaìsti sigarettas prus de deghe,
In sa pinneta, chi parìat una chea.
A pe et a caddu andaìsti a cuìle
Pesende porcu et anzone-'errile.
Andende a s'oliàriu, tue m'as nadu
Chi sos pilos nde tevimis segare
A sas àlveres, inùe fit lauradu.
Cumpresu-appo, puru chena rimare,
Chi fisti poéte, de donu dotadu:
De d'onzi cosa podisti cantare.
Et su rebuddu s'arrendìat frecuénte
A su zappu tou et a sa tua mente.
5.
Et cantas boltas, tue m'as cumbidadu
A bustare cun tegus, in sa mesa,
Chi sa petta aìsti già arridadu.
Fit pro dividìre sa tua ricchesa
Cun megus, no l'appo irmentigadu:
Et su porcheddu fit una bellesa.
In Tàttari-in mare, in Uri puru
Affaccu-a tie, deo fia semper seguru.
6.
De pisches puru fisti un'ischidu,
Et unu mastru fisti de sa catza,
Da-e sos sirbones su prus timidu,
De d'onzi puzone-ischisti sa ratza.
In sas bescidas da-e tottu sighidu,
A manzanile, a sero, cun atza,
Cun canna-'e pisca, a coddu fusile,
Semper cun cusciénscia, mai intzivile.
In 'Onorva tottu già ti connoschìant,
Bene chérfidu puru in tzittade,
Sos uresos a tie già ammiraìant
Piseddos, betzos, de d'onzi edade.
Cando cantaìsti, tottu iscultaìant
Sa peràula tua, fit autoridade.
De duìnas o ottavas mai iscrittas:
Sa reveréntzia già ti la merìtas.
8.
Su donu ch'aìsti no est cosa comuna:
Est raru chi s'omine potat poetare
Chentza mai difficultade peruna,
Comente faghisti, cun pagu pensare.
Su chi t'afféo, sa tua sola lacuna
Est bistada de no las imprentare.
Iscrittos tuos no nd'appo agattadu;
Cussa neghe: benis irmentigadu.
9.
Pro una prommissa fatta-a Busciànu
In-d'una die de una festa cumprida,
Ca ottavas ant boladu lontanu,
Juradu l'as chi nde l'aìsti finida.
Pro cuss'impignu, no amus in manu
Peruna cuartina, duìna lompìda:
Lassadu as a nois solu s'ammentu
De sa tua bravura, su tou portentu.
Pro cussu custas rigas appo-iscrittu
Pro narrer a tottu su chi tue fisti:
Pastore-infermiéri, Tiu emerìtu,
Amigu de tottu, tue lu cheristi.
Pro custas rejones, già t'ant beneìttu
Bene a sos àtteros tue faghisti:
Como-in paghe reposare ti lasso
Et a t'agattare de prus già passo.
🆅 Dal sito http://vocabolariocasu.isresardegna.it/lemmi.php
Ottada: strofa di otto endecasillabi (sei a rima alternata e gli ultimi due a rima baciata).
Assentu: fermezza, riposo.
Imbitzadu: avvezzare, abituare.
Cuntivizare: curare, coltivare custodire.
Roba: bestiame; stoffa, panno.
Laòre: frumento.
Assaniàdu: tranquillo, pacifico, contento.
Cundièrra: contesa.
Criadura: bambino, neonato.
Arveghe: pecora.
Suerende: sudando.
Leènde: prendendo.
Neghe: colpa.
Pinnetta: capanna.
Chea: carbonaia.
Cuìle: ovile.
Pesende: allevando, crescendo.
Errile: agnello nato d'inverno.
Oliàriu: oliveto.
Lauradu: arato.
Rebuddu: pollone.
Mesa: tavolo.
Petta: carne.
Arridadu: abbrustolito.
Irmentigadu: dimenticato.
Ischidu: saggio, saputo.
Sirbones: cinghiali.
Puzone: uccello.
Manzanile: al mattino presto.
Atza: faccia, ardire, sfrontatezza.
Coddu: spalla.
Duìnas: strofe da due endecasillabi (solitamente a rima baciata).
Peruna: nessuna, neanche una.
Affèo: biasimo, disapprovo.
Imprentare: imprimere, lasciare traccia.
Agattadu: trovato.
Cumprida: goduta, festeggiata.
Cuartina: strofa di quattro endecasillabi a rima alternata.
Lòmpida: compiuta.
Ammentu: ricordo.
 |
| ©suigante. Dall'archivio del Centro Culturale "Su 'Igante" Tiu meu, Sevadore Vàrgiu (frade de mama): custas ottavas las appo fattas pro issu. |
